Gen 9 | NdeIBE | STEP | UNkulunkulu wambusisa uNowa lamadodana akhe wathi kubo, “Zalani lande ngobunengi ligcwalise umhlaba.

Genesis 9

Isivumelwano sikaNkulunkulu loNowa

1 UNkulunkulu wambusisa uNowa lamadodana akhe wathi kubo, “Zalani lande ngobunengi ligcwalise umhlaba. 2 Zizalesaba zibe lovalo ngani zonke izinyamazana zomhlaba, lazo zonke izinyoni zemoyeni, lezinanakazana ezihuquzela emhlabathini, kanye lezinhlanzi zonke zasolwandle; ziphiwe ezandleni zakho. 3 Yonke into ephilayo lenyakazayo izakuba yikudla kuwe. Njengalokhu ngalipha izihlahla eziluhlaza, manje sengilipha yonke into.

4 “Kodwa lingadli inyama ilegazi lokuphila kwayo phakathi. 5 Njalo igazi lokuphila kwenu ngizafuna ukwazi ngalo, ngizafuna ukwazi kuyo yonke inyamazana. Njalo emuntwini wonke ngizafuna ukwazi ngempilo yomzalwane wakhe.

6 “Loba ngubani ochitha igazi lomuntu, igazi lakhe lizachithwa ngumuntu; ngokuba ngesimo sikaNkulunkulu, uNkulunkulu umenzile umuntu.

7 Mayelana lani, zalani lande ngobunengi; yandani emhlabeni libe banengi.”

8 UNkulunkulu wasesithi kuNowa lakumadodana akhe ayelawo: 9 “Manje sengimisa isivumelwano sami lani lezizukulwana zenu ngemva kwenu 10 laso sonke isidalwa esiphilayo esasilawe – izinyoni, izifuyo lezinyamazana zeganga, zonke lezo ezaphuma lani emkhunjini – sonke isidalwa esiphilayo emhlabeni. 11 Ngiyasimisa isivumelwano sami lani: Kakusoze njalo impilo yonke iqunywe ngamanzi kazamcolo; kakusoze njalo kube lozamcolo ozabhubhisa umhlaba.”

12 UNkulunkulu wathi, “Lesi yisiboniso sesivumelwano engisenzayo phakathi kwami lani laso sonke isidalwa esiphilayo elilaso, isivumelwano sezizukulwane zonke ezizayo:

13 Sengibeke umchilowamakhosikazi wami emayezini, wona uzakuba yisiboniso sesivumelwano phakathi kwami lomhlaba.

14 Kuzakuthi nxa ngiletha amayezi phezu komhlaba besekuvela umchilo wamakhosikazi emayezini, 15 ngizakhumbula isivumelwano sami phakathi kwami lani lazo zonke izidalwa eziphilayo ezemihlobo yonke. Kakusoze njalo lanini amanzi abe yisikhukhula esizabhubhisa impilo. 16 Kuzakuthi nxa kungavela umchilowamakhosikazi emayezini ngizawubona besengikhumbula isivumelwano saphakade phakathi kukaNkulunkulu lezidalwa zonke eziphilayo ezemihlobo yonke emhlabeni.”

17 Yikho uNkulunkulu wathi kuNowa, “Lesi yisiboniso sesivumelwano esengisimisile phakathi kwami lakho konke okuphilayo emhlabeni.”

Amadodana kaNowa

18 Amadodana kaNowa aphuma emkhunjini ayengoShemu, loHamu loJafethi. (UHamu wayenguyise kaKhenani.) 19 La ayeyiwo amadodana amathathu kaNowa, kuwo kwadabuka abantu abachitheka emhlabeni wonke.

20 UNowa, indoda yomhlabathi, wasuka wahlanyela isivini. 21 Wathi esenathe iwayini lakhona, wadakwa walala enqunu phakathi kwethente lakhe. 22 UHamu, uyise kaKhenani, wabona ubunqunu bukayise wasetshela abafowabo phandle. 23 Kodwa uShemu loJafethi bathatha isivunulo basiphosela emahlombe abo; bangena behamba nyovane bamboza ubunqunu bukayise. Ubuso babo babukhangele emuva ukuze bangaboni ubunqunu bukayise.

24 Kwathi uNowa esevukile selehlile iwayini wezwa ngokwakwenziwe kuye yindodana yakhe encane kulamanye,

25 wathi, “Uthukiwe uKhenani! Isichaka esiphansi sokucina uzakuba yiso kubafowabo.”

26 Wabuya wathi njalo, “Ubusisiwe uJehova, uNkulunkulu kaShemu! Akuthi uKhenani abe yisigqili sikaShemu.

27 Sengathi uNkulunkulu angaqhelisa isiqinti sikaJafethi; Sengathi uJafethi angahlala emathenteni kaShemu, njalo sengathi uKhenani angaba yisichaka sakhe.”

28 Ngemva kwesikhukhula uNowa waphila okweminyaka engamakhulu amathathu lamatshumi amahlanu. 29 Isiyonke, uNowa waphila okweminyaka engamakhulu aficamunye lamatshumi amahlanu, wasesifa.